चिखली (बातमीवाला): चिखली नगरपालिकेच्या निवडणुकांची धामधूम वाढत असताना तसेच मतदानाची तारीख जसजशी जवळ येत आहे तसा महाविकास आघाडीचा प्रचार प्रभाग क्रमांक १ मध्ये जोर धरू लागला आहे. चिखलीत राजकीय वातावरण तापलेले असले तरी प्रभाग क्र. १ मध्ये मतदारांच्या चर्चेचा केंद्रबिंदू एकच- काँग्रेसचे उमेदवार संतोष गवारे पाटील.
संतोष गवारे पाटील हे साध्या घरातून आलेले व्यक्तिमत्त्व. प्रभाग १ मध्ये अनेक वर्षे सातत्याने सक्रिय राहून नागरिकांच्या प्रश्नांमध्ये सहभाग घेतल्यामुळे त्यांची ओळख ‘आपल्या माणसाची’ बनली आहे. तसेच काँग्रेसच्या उमेदवारीनंतर प्रभागात त्यांच्याबाबत नवीन चर्चांना उधाण आले आहे. कोणताही आर्थिक आधार तसेच राजकीय वारसा नसल्याने फक्त सामान्य लोकांच्या अडचणींची जाणीव आणि त्यावर उपाय शोधण्याची तळमळ हे त्यांचे मोठे भांडवल मानले जाते.
हलाखीच्या परिस्थितीतून मार्ग काढत लहानपणापासूनच समाजकार्याला प्राधान्य दिल्याने त्यांची प्रतिमा जनतेमध्ये विश्वासार्हतेची बनली आहे. “आमचा मुलगा, आमचा भाऊ, आमचा मित्रच उमेदवार” अशी भावना मतदारांमध्ये दिसून येत आहे. त्यामुळे या निवडणुकीत ‘नगरसेवक’ आणि ‘जनसेवक’ या दोन प्रतिमांमध्ये खरी लढत रंगणार असल्याच्या चर्चा प्रगल्भ होत आहेत.
नेहमी उपलब्ध राहणारे, सर्वांसाठी काम करण्याची तयारी असलेले आणि सामान्य नागरिकांच्या प्रश्नांना अग्रक्रम देणारे उमेदवार अशी संतोष गवारे पाटलांची छाप प्रभागात दृढ झाली आहे. त्यामुळे प्रभाग १ मध्ये त्यांचा विजय निश्चित असल्याचे चित्र स्पष्ट दिसत आहे.
