Rajnath Singh On Trump Tariffs: संरक्षण मंत्री राजनाथ सिंह यांनी रविवारी अमेरिकेच्या राष्ट्राध्यक्ष डोनाल्ड ट्रम्प यांच्या भारतावरील आयात शुल्क वाढीवर अप्रत्यक्षपणे टीका केली. काही जागतिक शक्ती भारताच्या वेगवान आर्थिक वाढीचा हेवा करत असून, त्यामुळे देशाच्या अर्थव्यवस्थेला अडथळा आणण्याचा प्रयत्न करत असल्याचे त्यांनी सांगितले. ट्रम्प यांचे नाव न घेता सिंह म्हणाले, “काही ‘बॉस’ भारताच्या वेगवान विकासाला पचवू शकत नाहीत, ‘सबके बॉस तो हम हैं’ म्हणून ते हेवा करतात.”
या टीकेमुळे भारत आणि अमेरिका यांच्यातील व्यापारी तणाव अधिक गडद झाला आहे. अमेरिकेने अलीकडेच भारतीय वस्तूंवर २५% शुल्क लादले असून, रशियाकडून इंधन खरेदी सुरू ठेवल्याबद्दल अतिरिक्त २५% दंड आकारला आहे. ट्रम्प यांनी भारताची अर्थव्यवस्था ‘मृत’ असल्याचे म्हटले होते, तर त्यांच्या सहकाऱ्यांनी भारत रशियाच्या युद्धाला आर्थिक मदत करत असल्याचा आरोप केला आहे.
सिंह यांनी मात्र भारताच्या प्रगतीला कोणीही रोखू शकत नाही, असे ठामपणे सांगितले. “भारत इतक्या वेगाने पुढे जात आहे की, मी पूर्ण विश्वासाने सांगतो: जगातील कोणतीही शक्ती आता भारताला प्रमुख जागतिक शक्ती होण्यापासून रोखू शकत नाही,” असे ते म्हणाले. ते पुढे म्हणाले की, काही देश ‘मेड इन इंडिया’ उत्पादनांना महाग करण्याचा प्रयत्न करत आहेत, जेणेकरून त्यांची किंमत वाढून जग खरेदी करणे थांबवेल.
भारताच्या संरक्षण निर्यातीचे उदाहरण देत सिंह यांनी देशाच्या सामर्थ्याचा उल्लेख केला. “आम्ही २४,००० कोटी रुपयांपेक्षा जास्त मूल्याच्या संरक्षण वस्तू निर्यात करत आहोत. ही भारताची ताकद आहे, नव्या भारताच्या नव्या संरक्षण क्षेत्राची ही ओळख आहे, आणि निर्यात सतत वाढत आहे,” असे ते म्हणाले. या टीकेमुळे अमेरिका आणि भारत यांच्यातील संबंधांवर काय परिणाम होईल, याकडे सर्वांचे लक्ष लागले आहे.
