बातमीवाला: बुलढाणा जिल्ह्यातील कुलमखेड येथील एका तरुण दाम्पत्याच्या जीवनात आनंदाची चाहूल लागत असतानाच भीषण अपघाताने सगळं उधळून लावलं. सहा महिन्यांची गर्भवती जान्हवी संग्राम मोरे (वय २१) ही युवती कारला आग लागल्याने होरपळून मृत्युमुखी पडली. तिचा पती संग्राम मोरे (वय २२) यांच्या नजरसमोरच ही भयावह घटना घडली. या प्रसंगाने संपूर्ण परिसर हळहळला आहे.
भुसावळ तालुक्यातील बोर्डी येथील माहेरहून जान्हवीला घेऊन संग्राम हे दोघे कारने घरी परतत होते. संभाजीनगर-जळगाव महामार्गावर पहूर गावाजवळ सोमवारी दुपारी साडेतीनच्या सुमारास कारचं टायर फुटलं. त्यामुळे चालकाचं गाडीवरचं नियंत्रण सुटलं आणि कार दुभाजकाशी धडकली. धडकेच्या क्षणातच कारने पेट घेतला.
वार्ता कळताच स्थानिक नागरिक आणि वाहतूक पोलिसांनी घटनास्थळी धाव घेतली. लोकांनी कारच्या काचा फोडून संग्राम यांना बाहेर काढलं. ते किरकोळ जखमी झाले. मात्र, सुरुवातीला कारमध्ये आणखी कोणी असल्याचं कुणाच्या लक्षात आलं नाही. संग्राम यांनी “पत्नी आत आहे, वाचवा!” असं ओरडले, तेव्हा प्रयत्न सुरू झाले. पण आगीची तीव्रता इतकी की जान्हवीला बाहेर काढता आलं नाही. तिचा मृतदेह जळून खाक झाला.
अग्निशमन दलाने आग आटोक्यात आणली. संग्राम यांना रुग्णालयात दाखल करण्यात आलं. जान्हवीच्या मृतदेहावर पंचनामा पूर्ण करून शवविच्छेदनासाठी पाठवण्यात आलं. पोलिसांनी टायर फुटल्याच्या कारणास्तव अपघात झाल्याचं नोंदवलं असून गुन्हा दाखल केला आहे. तपास सुरू आहे.
महामार्गावरील असे अपघात वाढत असल्याने सुरक्षेचा मुद्दा पुन्हा ऐरणीवर आला आहे. चांगले रस्ते असले तरी वेगावर नियंत्रण आणि वाहनाची नियमित तपासणी याकडे दुर्लक्ष होतंय. विशेषतः टायरची स्थिती तपासणं अत्यंत गरजेचं आहे.
