Ladki Sunbai Yojana Announcement: महाराष्ट्रातील ‘मुख्यमंत्री माझी लाडकी बहीण’ योजनेने महिलांमध्ये मोठी क्रांती घडवली. आता याच धर्तीवर ‘लाडकी सूनबाई’ योजना सुरू करण्याचा राज्य सरकारचा विचार आहे. उपमुख्यमंत्री एकनाथ शिंदे आज 17 ऑगस्ट 2025 ठाण्यातील एका कार्यक्रमात या योजनेची घोषणा करू शकतात, अशी माहिती सूत्रांनी दिली. येत्या महापालिका निवडणुकीच्या पार्श्वभूमीवर ही योजना महायुतीसाठी महत्त्वाची ठरण्याची शक्यता आहे.
ठाण्यातील गडकरी रंगायतन नाट्यगृहात माजी महापौर मीनाक्षी शिंदे यांच्या नेतृत्वाखाली मंगळागौर कार्यक्रमाचे आयोजन करण्यात आले आहे. या कार्यक्रमाला उपमुख्यमंत्री एकनाथ शिंदे उपस्थित राहणार असून, याचवेळी ते ‘लाडकी सूनबाई’ योजनेचा शुभारंभ जाहीर करू शकतात, असे समजते. ‘मुख्यमंत्री माझी लाडकी बहीण’ योजनेप्रमाणे ही नवीन योजना नवविवाहित महिलांना आर्थिक आणि सामाजिक सक्षमीकरणासाठी प्रोत्साहन देणारी असेल, अशी चर्चा आहे.
‘माझी लाडकी बहीण’ योजनेतून 21 ते 65 वयोगटातील पात्र महिलांना दरमहा 1,500 रुपये थेट त्यांच्या बँक खात्यात जमा केले जातात. या योजनेने विधानसभा निवडणुकीत महायुतीला मोठा राजकीय फायदा मिळाला होता. मात्र, या योजनेत काही शासकीय कर्मचारी आणि काही पुरुषांनी लाभ घेतल्याच्या तक्रारींमुळे वाद निर्माण झाला होता. त्यानंतर लाभार्थींची कसून छाननी करून पात्र महिलांची यादी निश्चित केली गेली. आता ‘लाडकी सूनबाई’ योजनेमुळे नवविवाहित महिलांना विशेष लाभ मिळण्याची शक्यता आहे, ज्यामुळे त्यांचे कौटुंबिक आणि आर्थिक स्थैर्य वाढेल.
या योजनेच्या घोषणेची सर्वत्र उत्सुकता आहे. ठाण्यातील मंगळागौर कार्यक्रमात उपमुख्यमंत्री शिंदे यांनी यापूर्वीही अनेक महत्त्वाच्या योजना जाहीर केल्या आहेत. त्यामुळे आजच्या कार्यक्रमाकडे संपूर्ण महाराष्ट्राचे लक्ष लागले आहे. ‘लाडकी सूनबाई’ योजनेच्या माध्यमातून सरकार नवविवाहित महिलांना कशा प्रकारे सक्षम करणार, याची माहिती लवकरच समोर येईल.
