वळती (बातमीवाला): वाढदिवस साजरा करण्याच्या नवनवीन कल्पना आजकाल सोशल मीडिया वर पाहायला मिळत आहेत, पण काही जण मात्र या दिवसाचा उपयोग समाजासाठी करतात. असाच एक प्रेरणादायी उपक्रम वळती गावातील आदित्य धनवे पाटील या युवकाने राबवला. आपल्या जुन्या शाळेत जाऊन त्याने विद्यार्थ्यांसाठी शालेय साहित्याचे वाटप केले.
आदित्य हा जिल्हा परिषद मराठी उच्च प्राथमिक शाळेचा माजी विद्यार्थी. “ज्या शाळेत मी शिकलो, त्या शाळेला मीही काही तरी देणे लागतो,” या विचाराने प्रेरित होऊन त्याने आपल्या वाढदिवसाच्या निमित्ताने हा कार्यक्रम आयोजित केला. बुधवार दि. २१ जानेवारी २०२६ रोजी सकाळी १०.३० वाजता शाळेत हा सोहळा पार पडला. आदित्यने विद्यार्थ्यांना वह्या, पेन्सिल, रबर अशा गरजेच्या शालेय वस्तूंचे वाटप केले.
सध्या तरुणाई वाढदिवस म्हटले की केक, फटाके आणि पार्टी यातच रमते. पण आदित्यने या ट्रेंडला बाजूला सारून शाळेतील लहान मुलांना मदत करण्यावर भर दिला. शक्य तितक्या वस्तू घेऊन तो शाळेत आला आणि प्रत्येक मुलाच्या हातात त्या दिल्या. मुलांच्या चेहऱ्यावर दिसलेले ते निरागस हास्य, डोळ्यातील चमक आणि आनंद पाहून आदित्यचेही मन भरून आले.
आदित्यने डी. फार्मसीचे शिक्षण पूर्ण केले आहे आणि सध्या तो बी. फार्मसी करत आहे. अभ्यासाबरोबरच तो सामाजिक कार्यातही सक्रिय असतो. या उपक्रमासाठी शाळेतील शिक्षक आणि आदित्यचे मित्र उपस्थित होते. गावकऱ्यांनीही त्याच्या या कार्याचे मनापासून कौतुक केले.
